វេជ្ជបណ្ឌិតបាននិយាយកាលពីថ្ងៃព្រហស្បតិ៍ទី ១១ ខែមិថុនាថា ស្ត្រីអាយុខ្ទង់ ២០ ឆ្នាំម្នាក់បានក្លាយជាមនុស្សដំបូងគេនៅសហរដ្ឋអាម៉េរិកដែលបានទទួលការវះកាត់ប្តូរសួតទ្វេដងសម្រាប់ជំងឺកូវីដ៩ ដោយផ្តល់ក្តីសង្ឃឹមដល់អ្នកជំងឺផ្សេងទៀតដែលកើតកូវីដ។
នាងបានចំណាយពេល ៦ សប្តាហ៍នៅក្នុងបន្ទប់សង្គ្រោះបន្ទាន់នៃមន្ទីរពេទ្យ Northwestern Memorial នៃទីក្រុងឈីកាហ្គោ កន្លែងដែលម៉ាស៊ីនទ្រទ្រង់ជីវិតបានបំពេញការងារបេះដូងនិងសួតរបស់នាងដើម្បីរក្សាជីវិតរបស់នាង។
ប៉ុន្តែនៅដើមខែមិថុនាសួតរបស់នាងបានខូចខាតយ៉ាងធ្ងន់ធ្ងរ ដូច្នេះការវះកាត់ប្តូរសួតគឺជាក្តីសង្ឃឹមតែមួយគត់សម្រាប់នាង។
លោក អានគីត បារ៉ាត់ ប្រធានផ្នែកវះប្តូរសួតនៅឯកម្មវិធីវះកាត់ប្តូរសួតនៃមន្ទីរពេទ្យ Northwestern Medicine បានប្រាប់ទីភ្នាក់ងារសារព័ត៌មាន AFP ថា “សួតរបស់នាងមិនបានបង្ហាញសញ្ញានៃការជាសះស្បើយអ្វីសោះ ហើយតាមពិតទៅពួកវាបានចាប់ផ្តើមវិវត្តទៅរកជំងឺក្រិនសួតដំណាក់កាលចុងក្រោយ”។
ជំងឺក្រិនសួតគឺជាស្នាមប្រហោងៗអចិន្ត្រៃយ៍នៃជាលិកាសួតដែលជាហេតុនាំឱ្យមានការបំផ្លាញថង់ខ្យល់។
នាងក៏មានប្រហោងធំៗនៅក្នុងសួតខាងឆ្វេងរបស់នាងផងដែរ ដោយទុកឱ្យវាងាយឆ្លងបាក់តេរីគ្រោះថ្នាក់។
ប្រហោងសួតទាំងនេះជាលក្ខណៈប្លែកមួយនៃជំងឺកូវីដ១៩ ហើយវាបានធ្វើឱ្យគ្រូពេទ្យទាល់គំនិតជាខ្លាំង។
លោកបារ៉ាត់ អាយុ ៤០ ឆ្នាំបានធ្វើការវះកាត់សួតរាប់សិបដងប៉ុន្តែនិយាយថា ការវះកាត់ប្តូរសួតឱ្យនាងកាលពីថ្ងៃទី ៥ មិថុនាគឺ “លំបាកខ្លាំងណាស់” ដោយត្រូវចំណាយពេល ១០ ម៉ោងជាជាងពេល ៦ ម៉ោងដូចការវះកាត់សព្វមួយដង។
ហេតុផលមួយផ្នែកគឺដោយសារតែសួតរបស់នាងបានជាប់ទៅនឹងរចនាសម្ព័ន្ធជុំវិញនិងពិបាកដកចេញ។
លោកបារ៉ាត់បានបន្ថែមទៀតថា ភាពជោគជ័យនៃការវះកាត់បានធ្វើឱ្យគាត់ “គិតនិងសង្ឃឹមយ៉ាងមុតមាំថាយើងអាចធ្វើការវះកាត់ប្តូរសួតឱ្យអ្នកជំងឺជាច្រើនទៀតដែលឥឡូវនេះត្រូវបានដាក់នៅនឹងម៉ាស៊ីនដកដង្ហើម ពីព្រោះសួតរបស់ពួកគេត្រូវបានបំផ្លាញជាអចិន្ត្រៃយ៍”៕ ដោយ៖ កញ្ញាដាលីស